Қазақстандағы жетекші дәрі-дәрмек өндіруші Polpharma Santo және Қазақстан Республикасының Денсаулық сақтау министрлігі Қазақстан Республикасы Үкіметінің шешіміне сәйкес Инвестициялар туралы келісімге (ИТК) қол қойды. Келісім халықты сапалы, қауіпсіз әрі қолжетімді дәрілік заттармен қамтамасыз ету саласындағы ұзақ мерзімді әріптестікті дамытуға және өзара іс-қимылдың тиімділігін арттыруға бағытталған.

Қазақстан Республикасы Үкіметінің мәлімдемесіне сәйкес, жоба Мемлекет басшысының қазақстандық тауар өндірушілердің үлесін арттыру, елдің дәрілік қауіпсіздігін нығайту және инвестицияларды проактивті тарту жөніндегі тапсырмаларын орындауға бағытталған. Ол мемлекеттің стратегиялық міндеттеріне сай келеді, саланың орнықты технологиялық базасын қалыптастырады, дәрілік заттардың сапасы мен қолжетімділігін қамтамасыз етуге, сондай-ақ экспорттық әлеуетті күшейтуге негіз болады.

Инвестициялар туралы келісімге қол қою Polpharma Santo компаниясының ауқымды инвестициялық жобасының жаңа кезеңін іске қосудың негізін қалайды. Инвестициялардың жалпы көлемі 39,5 млрд теңгені құрайды, ал жобаны іске асыру 2026–2036 жылдар аралығында жоспарланған. Жобалау, құрылыс, жаңғырту және өндірістік алаңдарды техникалық жарақтандыру жұмыстары Шымкент қаласындағы компанияның қолданыстағы зауытында жүргізіледі. Осы кезеңде компания кемінде 300 жаңа жұмыс орнын ашуды жоспарлап отыр.

Polpharma Santo жобасы саланың ең өршіл бастамаларының бірі саналады. Құрылыс жұмыстары 2027 жылы басталып, жаңа өндірістің алғашқы кезеңі 2029 жылдың соңында пайдалануға беріледі. Бұл елдің ішкі дәрі-дәрмекпен қамтылуын едәуір арттырып, дәрілік қауіпсіздікті нығайтуға мүмкіндік береді. Жобаның экспорттық әлеуеті 100 млн АҚШ долларына дейін бағаланады, ал 2050 жылға қарай компания өнімінің кемінде 50%-ын сыртқы нарықтарға бағыттауды көздейді.

Жаңа өндірістік желілер онкологиялық, жүрек-қантамыр, инфекциялық және созылмалы ауруларды, сондай-ақ туберкулезді емдеуге арналған препараттар шығаруға бағытталады. ИТК аясында компания әлеуметтік маңызы бар 38 атаудағы дәрілік затты өндіруді қамтамасыз етеді. Өндіріс GMP EC және GMP ЕАЭО халықаралық стандарттарына сәйкес болады, бұл шығарылатын өнімнің жоғары сапасына кепілдік береді.

Сонымен қатар, Polpharma Santo ғылыми-зерттеу және тәжірибелік- конструкторлық жұмыстарды (ҒЗТКЖ) дамыту мен сертификаттауға 10 млрд теңге бөлуді, ал инвестицияның жалпы көлемінің кемінде 25%-ын R&D бағытын дамытуға — биоэквиваленттілікті зерттеу, тіркеу құжаттарын дайындау және халықаралық сапа стандарттарын енгізуге бағыттауды жоспарлап отыр. ИТК-ны іске асыру нәтижесінде сатып алулардағы отандық өнім үлесі кемінде 15%-ға артады.